دليلك عند شراء شقة تمليك في مصر: من البحث لحد التوقيع

عالم العقارات كبير جدا ومليان تفاصيل، في أسئلة كتيرة بتجيلنا عن “ما هي خطوات شراء شقة تمليك؟ ” أو ” اعمل ايه عشان اشتري شقه؟ “، في ناس بتكون مش عارفة تبتدي إزاي. فلو ناوي تشتري شقة في مصر، الرحلة دي ممكن تكون مرهقة شوية، بس مع شوية تنظيم وخطوات واضحة، هتلاقي نفسك على الطريق الصح. في المقال من فورسواب، هنتكلم عن كل المراحل الأساسية اللي هتعدي عليها، من أول ما تبدأ تفكر لحد ما تمسك مفتاح الشقة في إيدك.

حدد احتياجاتك وإمكانياتك

قبل ما تبدأ تدور، لازم تسأل نفسك شوية أسئلة:

• إيه مساحة الشقة  اللي تناسبك؟
• ايه هو الموقع اللي بتفضل تكون فيه الشقة؟
• ميزانيتك كام؟
• هتدفع كاش ولا بالتقسيط؟

لما تجاوب على الأسئلة دي، هيبقى عندك فكرة واضحة عن الشقة اللي بتدور عليها.

لو انت من سكان أكتوبر أو الشيخ زايد .. شوف هنا 8 من أفضل كمبوندات الشيخ زايد و6 أكتوبر بأسعار الوحدات 2025

 اعمل بحث شامل عن المناطق

اختيار المكان هو أهم خطوة. خليك مركز على:

• الخدمات: مدارس، مواصلات، مستشفيات، مراكز تسوق.
• الأمان: هل المنطقة آمنة وهادية؟
• المستقبل: هل المنطقة بتتطور؟ ده مهم عشان قيمة شقتك تزيد مع الوقت.

مناطق زي أكتوبر، الشيخ زايد، التجمع الخامس، والعاصمة الإدارية الجديدة بقت من أشهر الخيارات.

أنواع الشقق: قرر نوع الشقة اللي عايزها

• شقة جديدة في كمبوند: مناسبة لو بتدور على راحة وخدمات متكاملة.
• شقة في حي من الأحياء السكنية في عمارة عادية: أرخص شوية وغالبًا في قلب المدينة.
• إعادة بيع (Resale): خيار مناسب لو عايز شقة جاهزة للسكن فورًا.

لو ناوي تشتري في التجمع الخامس والقاهرة الجديدة .. شوف هنا أفضل 10 كمبوندات في التجمع الخامس بالأسعار.

معاينة الشقة الجديدة

1. لازم تعاين الشقة كويس وتتأكد بنفسك من مساحتها وتراجع الرسم الهندسي وتشوف إذا كان مطابق للواقع ولا لأ. كمان، لازم تتحقق من تراخيص المباني وتتأكد إنها صادرة من الجهة المختصة وتشوف عدد الأدوار المرخصة، عشان تتأكد إن الشقة اللي عايز تشتريها موجودة ضمن الأدوار المرخصة وما تتعرضش لمشكلة إزالة الدور اللي فيه الشقة من الجهة المختصة.
2. تقدر كمان تتأكد من ملكية العقار نفسه عن طريق التواصل مع الحي اللي تابع ليه العقار، وتستعلم لو فيه أي مشاكل في التراخيص.
3. بالنسبة للخدمات، لازم تسأل الحي عن الخدمات الموصلة للعقار، خصوصًا لو الخدمات زي الكهرباء لسه ما اتوصلتش. أحيانًا بيكون فيه مشاكل في إدخال الكهرباء للمنطقة أو للدور اللي فيه الشقة.
4. وكمان، تقدر تستعلم عن حالة باقي الخدمات في الشقة من خلال الإيصالات اللي تم استلامها قبل كده، زي إيصالات الكهرباء والمياه والغاز والتليفون الأرضي. ممكن تطلب صور من الإيصالات دي وتتأكد إن صاحب الشقة متعاقد على الخدمات دي وبيسدد فواتيرها لحد آخر موعد قبل ما تشتري الوحدة.

افحص الأوراق وعقد بيع الشقة كويس

ما تستهونش بالمستندات. لازم تتأكد إن كل المستندات الخاصة بالشقة مظبوطة ودي أهم البيانات اللي لازم تراجعها قبل ما تمضي العقد 

1. لازم يتكتب اسم المشتري والبائع بالكامل: رقم البطاقة (ويفضل إن كل طرف ياخد صورة من بطاقة الطرف التاني) – عنوان محل الإقامة بالكامل.
2. يتكتب وصف تفصيلي للشقة مع توضيح المساحة بدقة. لو فيه عجز أو زيادة في المساحة المكتوبة في العقد بنسبة أكتر من 10%، العقد بيترفض في الشهر العقاري.
3. يتكتب عنوان العقار المعروض للبيع  بشكل دقيق، رقم العقار في الحي، اسم الشارع، المنطقة، والمحافظة. كمان، لازم يتكتب بيان قطعة الأرض، زي رقم القطعة والمربع والحوض بناءً على البيانات المساحية.
4. توضيح سعر البيع وطريقة الدفع بشكل واضح ومحدد.
5. يتعمل شرح وافي عن كيفية تملك البايع للشقة، مع ذكر كل العقود اللي تثبت الملكية بشكل متسلسل، لحد ما نوصل لرقم العقد المسجل القديم للعقار. لو فيه ورثة، لازم يتكتب رقم وتاريخ إعلام الوراثة والمحكمة اللي أصدرته. وكمان، لازم المشتري يستلم كل عقود الملكية القديمة من البايع.
6. لازم يكون فيه بند صريح إن المالك يضمن أي عيوب خفية بشكل كامل، ويقر بمسؤوليته لو ظهر أي عيب خفي في العقار، سواء كان العيب مادي أو قانوني. كمان، يتضاف باقي البنود اللي تضمن إن مفيش استحقاقات مالية متأخرة للدولة على العقار، زي الضرائب أو فواتير المياه والكهرباء لحد تاريخ البيع.

وبما اننا اتكلمنا عن البيانات اللي لازم تكون موجودة في العقد، ممكن ناخد نظرة سريعة على أنواع العقود في حالة شراء شقة

أنواع عقود شراء أو بيع شقة

• عقد بيع مسجل بالشهر العقاري

ده أفضل نوع عقد بيع شقة لأنه بيكون مسجل رسميًا في الشهر العقاري وبيحتوي على رقم شهر وتاريخه. العقد ده آمن جدًا، ولو ضاع ممكن تطلع نسخة رسمية منه. المشترى محتاج يتأكد من صحة العقد بالشهر العقاري، والإجراء ده بياخد يوم واحد. العقد ده معروف باسم “العقد الأخضر” وبيعتبر أقوى سند ملكية.

• عقد بيع ابتدائي

عقدبيع بين البائع والمشتري وله 3 أشكال:

1. عقد بيع شقة عليه حكم بصحة ونفاذ: العقد ده قريب جدًا في قوته من العقد المسجل وبيوفر أمان عالي للمشتري.
2. عقد بيع عليه حكم بصحة التوقيع فقط: لازم يكون معاه تسلسل عقود ملكية واضحة لحد أقرب عقد مسجل، والتأكد من صحة العقود دي.
3. عقد بيع ابتدائي بدون أي أحكام: النوع ده خطير جدًا لأنه ممكن أي حد يصطنعه بسهولة. لازم تتأكد من صحته كويس قبل ما تعتمد عليه.

و تقدر توفر على نفسك الدخول في كل التفاصيل وتستشير محامي متخصص قبل التوقيع.

وأخيرًا، بعد توقيع العقود، بيتفق المشتري والبائع على الذهاب لمكتب الشهر العقاري عشان تحرير التوكيل من البائع للمشتري. التوكيل ده بيوفر على المشتري اللجوء للبائع في المستقبل لو حب يسجل الوحدة أو يتعامل مع أي جهة حكومية زي شركة الكهرباء أو المياه أو الغاز أو التليفون لنقل العدادات باسم المالك الجديد. التوكيل المحرر في الشهر العقاري بيسهل الإجراءات وبيوفر الوقت بشكل كبير.

الأوراق والمستندات المطلوبة في الشهر العقاري عند شراء أو بيع شقة تمليك جديدة

لما حد من الطرفين، سواء البائع أو المشتري، يروح يقدم طلب تسجيل شقة في الشهر العقاري، لازم يكون معاه المستندات التالية:

1. عقد سند الملكية (اللي يثبت ملكية البائع للشقة).
2. عقد البيع الابتدائي اللي بين الطرفين.
3. شهادة مكلفة عقارية من الضرائب العقارية (لو العقار قديم).
4. رخصة المباني (لو العقار حديث).

وفيه إجراءات تكميلية هتعرفها خلال التسجيل في الشهر العقاري، زي تحرير كشف التحديد أو استمارة التغيير، ودفع الرسوم وغيرها من الخطوات.

خطوات عمل إعلان شقة للبيع على فورسواب مجانًا

1. تسجيل الدخول أو إنشاء حساب:  قم بتسجيل الدخول إلى حسابك على فورسواب أو أنشئ حسابًا جديدًا بسهولة.
2. إضافة تفاصيل الشقة: املأ المعلومات الأساسية مثل الموقع، المساحة، عدد الغرف، والسعر المطلوب.
3. تحميل الصور: قم برفع صور واضحة وعالية الجودة للشقة لجذب المزيد من المشترين. (شوف هنا أفضل تطبيقات لتصوير المنتجات باحتراف بالموبايل)
4. اختيار الفئة المناسبة: حدد فئة “عقارات” لضمان ظهور إعلانك في المكان المناسب.
5. نشر الإعلان مجانًا:  بعد مراجعة التفاصيل، اضغط على “نشر” ليكون إعلانك متاحًا للمشترين المهتمين.

لو عايز تعرف أكتر عن أخبار التكنولوجيا والعربيات وآخر أخبار سوق العقارات في مصر، تابع مدونة فورسواب هتلاقي عليها كل المعلومات اللي تهمك اللي تساعدك في إتخاذ قرارات الشراء.